ياليل الهجر كافـي شفت منك رزايا
كلهم سافروا عني وبقت بس السبايا
1
آنه فاطمــــة والمدمــــع يهــــل
جيت أنظر هلي من خلصو جتل
من شفت الوضع جن زاد الحمل
ماعدهم رحم حـــتى أعله الطفل
ياوسفة الطفل أسمه أنشمل وي الضحايا
كلهم سافروا عني وبقت بس السبايا
2
أول ماشفـــــــت وإنهــــــار الألم
من طاح الكمـــر وأنصاب بسهــم
جسمه أعله النهر وتنادي الحرم
عكبك ياكمـــــــر حـــركوها الخيم
راح ومارجع لينه ولا بجفوفه راية
كلهم سافروا عني وبقت بس السبايا
3
بعيوني الصبـــر وأشـرح ياوضع
أنظر للربــــاب ونهــــا المنفجــع
لن رملة هـــــوت محنيــــة ظلــع
وحدة أتهل دمع وحدة أتوج شمع
كل وحدة أبنها زفتها لصوب المنايا
كلهم سافروا عني وبقت بس السبايا
ياليل القلب بـــي ميـــــة جــرح
ريته لا يهل ويصيـــــر الصبــح
خوفي أعله الأهل باجر تنذبــح
وأنظر للولي رأسه أعله الرمح
وزينب تنسبي ويمها جثث كل الحماية
كلهم سافروا عني وبقت بس السبايا
5
أنده للكمر والناظــــــــر يصب
باجر يل أخـــــو زينب تنسلب
آه وبالسيــاط أختـــــك تنضرب
ويحديها الشمر لديار الغـــرب
من فوك الهزل ومحاوطه بجيش وسرايا
كلهم سافروا عني وبقت بس السبايا
6
تمشي وتلتفت واتصيح الـــــوداع
يهلي بهل مسه كلشي بعمري ضاع
نادت للأهل وأنه أصغي السماع
أتكلهم بس دمع قدر المستطـــاع
صاحت ياهلي سيل الدمع مابي كفاية
كلهم سافروا عني وبقت بس السبايا
شطره
امجد صاحب ألشطري
ليست هناك تعليقات:
إرسال تعليق