يحسين بچفوفـك حـلو عبدالله چَـنّه ورده
من تاخْذه الباب الخيم خاف السهم يِگَعده
آه . رُگْـبته تَرفه الطفل
آه . والسهم ما ينحمل
عبدالله چَـنّه ورده
----------------------------------
اوليدي عطشان .. چان يبچي وتـوّه غـمّض عينه شفته
اوليدي عطشان .. امن العِطش يحسين ذِبلت حتّه شفته
گلبي مـن يـبچي يگَطْعْ انـياطه
شــــادّه روحــي عـَـلَـگ بگمـاطـه
النـظــر عـن لا يـنجـرح هالحاطه
ازغـيْر نحـره وما تـفيده اخياطه
اسم الله عليه منّ السهم ما يرهم اعله گدّه
لو صاب نحـره يـنـذبح وشلـون نحره اشدّه
آه . خايفه الجسمه يشِل
آه . والسـهـم مـا يـنـحـمل
عبدالله چَـنّه ورده
----------------------------------
اوليدي محلاه .. چَـنّه ورده امفتْحه وارتاح امن اشمّه
اوليدي محلاه .. اتـردلي روحي لـو على صدري اضمّه
روحي احسها ابهالطفل مشدوده
خـايْفـه امــن السهم يكـسر عوده
ثـغــري مـا لـحّـگ يـقَــبْــل اوروده
هِــنّه سـت بوسات فوگ اخـدوده
يـبـني دللـول الولــد والمهـد بـاچـر خــالي
من عنده خل اشبع نظر مادام هسّه اگبالي
آه . حقّه لو دمعي يهل
آه . والسهـم ما ينحمل
عبدالله چَـنّه ورده
----------------------------------
گلبي محتار .. جيـش امـيّه عالخيم لو قـرّر ايـصول
گلبي محتار .. خاف منّي ايطيح وايسِحْگنّه الخيول
الخيل من تهجم بيــوم العاشر
ويـن اضـم عــبدالله گـلّي باچر
لــو وگـع من عنـدي الله الـساتر
ازغـير صدره وما يرِحْمه الحافر
صدر الطفل ما يحتمل حافـر فـرس يِدوسه
اتحيّرِت ما بـيـن النحر والصدر ويـن ابوسه
آه . ينسحگ لا مو سهل
آه . والسـهم ما يـنحمل
عبدالله چَـنّه ورده
----------------------------------
خوفي ينصاب .. ابنحـره بس لا حـرمله ايصوّب حبـيبي
خوفي ينصاب .. صدري خاف ايلچمه من يرضع حليبي
مــن تـجـيـبه ورُكْبـته مـذبـوحـه
صدري خاف ايلچـمه منّ ايلوحه
خـوفـي مـنّ الألـم تـطـلـع روحـه
بلـكي من يرضع تِـهِـيد اجروحـه
يـحـســيـن سَـنـتـيـن الطـفـل لــمَّـن تـفُـطْـمـه امّـه
وعمْر ابني ست اشهر تره اشلون السهم يِـفُطْـمه
آه . صعبه ظامي يرتحل
آه . والسهـم ما يـنحـمل
عبدالله چَـنّه ورده
----------------------------------
ويـن اودّيـه .. ماكـو عـندي غـيـر بـس صدري افِـتْحه
ويـن اودّيـه .. ويـن اضمّه امن السهـم عـن لا يـذِبْـحه
راح اضمّه آنه وسْـط اعيوني
حتى لــو صابه السهم يعموني
اخلافه شلّي بدنيتي ايخلوني
اوياه بنفس النبله خَيذبحوني
الوجـهه اذا ما شـاهدت للضوه شلون اندلّه
ابعبـدالله اشتـمّ الهوه وانتـهي ابلا عبدالله
آه . كُـون بـعـيـوني يـظــل
آه . والسـهــم ما يـنـحـمل
عبدالله چَـنّه ورده
----------------------------------
تمّت والحمد لله في
31 / 7 / 2016م
حيدر تركي الكربلائي
ليست هناك تعليقات:
إرسال تعليق