في ل 10
الليله دمعه الليله نوح .. اوباجر اسهام اوجُروح
الليله يم زينب أهلها .. اوباجر الدمعه تهلها
& & & & &
الليله آهات اومدامع .. تجري من عين السماء
الليله مشغوله ابحزنها .. وابلطُمها الأنبياء
اوباجر الحره تشاهد .. تنزف انحور الإباء
اوباجر اتشاهد أخوها .. احسين عاري ابكربلاء
الليله يا محلا الوِداع .. اوباجر اسياط اوضياع
اتسولف الليله اوْيه أملها .. اوباجر الدمعه تهلها
& & & & &
الليله زينب يمها اخوها .. صاحب الرايه الغيور
باجر اخوَلّه يسبها .. والكمر لا ما يثور !!
لا تأمِّن بالعواقب .. هالزمن طبعه يدور
والاّ هاي الحره زينب .. اشطَلّعاها اوْيه الكفور ؟!!
الدنيه كل لحظه تميل .. شِمْر إجه بعد الكفيل
وين أبو فاضل سألها ؟! .. اوباجر الدمعه تهلها
& & & & &
الليله زينب بالمُخيَّم .. كامت اتوِّنِّ اوتنوح
ما أصدِّكـ عني باجر .. خويه ابو فاضل يروح !!
اولا أصدْكـ احسين يرحل .. اويلجم ابكلبي الجُروح !!
لجن من نِظرت سِماها .. كل جَرِح شافت يلوح
شافت ارماح اوسِيوف .. هم نحر دامي اوجُفوف
تنسبي المنظر يكلها .. اوباجر الدمعه تهلها
& & & & &
باجر اتشوف العقيله .. احسين عالذاري صَريع
وابسِيوف ازلام اميَّه .. نحر ابو الأكبر كِطيع
واتنظر الحره ابألمها .. باجر المنظر فَظيع
من يفطمون الأعادي .. بالسهم ذاكَ الرضيع
باجر اتشوف الحسين .. يكطع ابنحره .. اللعين
اهنا صبرها ما حملها .. اوباجر الدمعه تهلها
& & & & &
الليله يمِج حامي خدرِج .. زينب اودمعِج يسيل
اشلون باجر لُو صُفيتي .. يالعقيله ابلا كفيل ؟!
امْن المدينه ابهيبه شلتي .. يا شرف حامي الدخيل
بس غداً يسبوج اميه .. اوتصعدين اعله الهِزيل
يمِج الليله الكفيل .. والشمر باجر يعيل
هاي ما صارت مثلها .. اوباجر الدمعه تهلها
& & & & &
باجر امْن الغاضريه .. تمشي واجروحِج تزيد
وابعُيونِج تبكه صوره .. النحر أبو اليمه الشهيد
من تذكرينه عُيونِج .. تبجي والدمع اشيفيد ؟!
بس تظل أصعب مصيبه .. اوكوفِج ابمجلس يزيد
اوكوفِج ابمجلس يزيد .. يجرح احساس الشهيد
لوّع الطف اوبطلها .. اوباجر الدمعه تهلها
& & & & &
خادم السيدة زينب (ع) : إبراهيم الدريس
ليست هناك تعليقات:
إرسال تعليق