هلت اربعين حسين وانا جالس ابداري

هلت  اربعين  حسين
       وانا جالس ابداري
وعيوني على  الزوار
       والله اعلم  ابحالي
انظرهم على التلفاز
      ومني دمعي يبرالي
كنت احسب السنه بازور 
        لكن خابت امالي
على اعتابك يابواليمه
          كنت اظن الي جيه
امني خاطري المكسور
           و كل سنه اقول هيه
وسنه تجي وسنه  بي طوف
           و الحسره تظل بيه
يمتى حبيب يسجلني 
           ومع الزوار اللي جيه

يا زوار الغريب بالطف
             اذكروني بممشاكم
تمنيت العمر يرحل
          بس امشي انا وياكم
يحفظكم رسول الله
           يا زوار و علي حماكم
و تستقبلكم الزهره
         و عضيد حسين ينخاكم 

تعب قلبي وانا اقرى
             رسايلكم  تودعني
برائة ذمه تطلبها
          ومني الدمعه تسبقني
اخذني وياك لبو اليمه
            و على بابه وهملني
احس روحي تنادي
          حسين اريد زياره وديني😭😭😭😭

يا بوفاضل

يابوفاضل   طيحة ايدك مو وقتها
يابوفاضل   ضربوا امتوني وردتها
يابوفاضل   زينب انا الواعدتها
       يا بوفاضل
والله دنيا وصارت اخبارك بعيده
وانته ذاكه العشت كل عمري بوريده
اذكر الشامت قبل من يرفع ايده
ما اميّز بينك وبين الرعيده
اشتكيلك   والشمس صبغت عباتي
اشتكيلك   جنت وياك شحلاتي
اشتكيلك   روحي ورده وذبلتها
        يابوفاضل
يابوفاضل   طيحة ايدك مو وقتها
يابوفاضل   ضربوا امتوني وردتها
يابوفاضل   زينب انا الواعدتها
       يا بوفاضل
خويه مشتاقتلك بقد ما نخيتك
خنقه صارت بالمخيّم واعتنيتك
قبل لا اوصل إلك وصلت منيتك
عمت عيني امخضّر الدم بلحيتك
هذا حالي   قصتّي انطبعت بديه
هذا حالي   ليش مادفنوك بيه
هذا حالي.  دمعتي بخدي عفتها
         يابوفاضل
يابوفاضل   طيحة ايدك مو وقتها
يابوفاضل   ضربوا امتوني وردتها
يابوفاضل   زينب انا الواعدتها
       يا بوفاضل
قلبي ما ينطيني سهم العين اعوفه
لون وجهك حيل متغيّر اشوفه
خويه دليني اعله جرحك حتى اروفه
قلي وين اليوجعك خليني اطوفه
انا وانته.  نشبه اشراع السفينه
انا وانته   امتون واجفوف التقينه
انا وانته.  وحده موتتنه ردتها
        يابوفاضل
يابوفاضل   طيحة ايدك مو وقتها
يابوفاضل   ضربوا امتوني وردتها
يابوفاضل   زينب انا الواعدتها
       يا بوفاضل
راسك اعله الرمح وجفوفك قطيعه
ماعرفتك من لقيتك عالشريعه
ليش ساكت ضاقت بعيني الوسيعه
احجي حرقت خيمتي نار الفجيعه
ياهضيمه   الماي يتبده اويه عمرك
ياهضيمه.  امدافع اسهام اعله ظهرك
ياهضيمه.  خويه رايح ماقلتها
        يابوفاضل
يابوفاضل   طيحة ايدك مو وقتها
يابوفاضل   ضربوا امتوني وردتها
يابوفاضل   زينب انا الواعدتها
       يا بوفاضل
يوجع افراق الاخو وداعة شبابك
من بعيد ايبيّن بوجهي غيابك
راح اوزع جم نهر خويه بثوابك
واقضي كل العمر منتظره اعله بابك
ما اعوفك   لحد ما تعمه النواظر
ما اعوفك.  ادري ما تكسرلي خاطر
ما اعوفك.  يا اخو الما رخصتها
        يابوفاضل
يابوفاضل   طيحة ايدك مو وقتها
يابوفاضل   ضربوا امتوني وردتها
يابوفاضل   زينب انا الواعدتها
       يا بوفاضل
شلون اردّن للخيم وعيوني حمره
لو سالني حسين عنك بيش اصبره
هاي اول مره اشوف ايده اعله ظهره
فرقة الخوّان ماتوصلها كسره
باربعينك.  خويه مشايه اعتنيلك
باربعينك.  اترس عيوني واجيلك
باربعينك.  ارسم اهمومي العشتها
       يابوفاضل
يابوفاضل   طيحة ايدك مو وقتها
يابوفاضل   ضربوا امتوني وردتها
يابوفاضل   زينب انا الواعدتها
       يا بوفاضل
دارت الدنيا وتفارقنه ابسهوله
انت طايح والخصم يمشي اعله طوله
بداخلي ديرة حجي خليني اقوله
بعدك اتصبّح فعل ماضي الرجوله
ما اعاتب.  لا تظل تحرق ابدمك
ما اعاتب.  عفت كسرة ظهري يمك
ما اعاتب.  انت روحي الما عفتها
       يابوفاضل
يابوفاضل   طيحة ايدك مو وقتها
يابوفاضل   ضربوا امتوني وردتها
يابوفاضل   زينب انا الواعدتها
       يا بوفاضل
ما اقلّك ارجع اعرف مستحيله
بس اقلك طيحة المالح ثقيله
خويه جاملني احلفك بالعليله
قلي بس فترة غيابك مو طويله
ما اريدك.  تعتذر ياخويه مني
ما اريدك.  تنقهر وتزيد ونّي
ما اريدك.  بس اريدك اي قلتها
       يابوفاضل
يابوفاضل   طيحة ايدك مو وقتها
يابوفاضل   ضربوا امتوني وردتها
يابوفاضل   زينب انا الواعدتها
       يا بوفاضل
يابوفاضل، باسم الكربلائي،السيد رفعت الصافي

يا نبضًا لإحْساسِي

يا نبضًا لإحْساسِي
                          بأنفاسي هواكا
فالقلبُ وَ ما يهوى
                          ولن يهوى سواكا
قد عِشْتُ المآسي
                          في كلّ الحَوَاسِ
أحاسيسي اِتجاهك صعبه تتكتّم
إذا أمسِك لِساني اعيوني تتكلّم
يسَهْلِ اْو ممتنِع يا واضح او مُبهم
يباني ابكل شبر من الارض مأتم
ابْحواس الخمسه مِسْتَشْعر معاني الهَم
اثْنَعَش شْهر ابحيَاتي صايره امْحرّم

هذا نزْفُ أحزاني
                          بشرْيَاني شَجاكا
والنبضُ صدى ندبي
                          ففي قلبي عزاكا
وقْعُ الحزنِ قَاسي
                          في كلّ الحَوَاسِ

يا نبضًا لإحْساسِي
                          بأنفاسي هواكا
فالقلبُ وَ ما يهوى
                          ولن يهوى سواكا
قد عِشْتُ المآسي
                          في كلّ الحَوَاسِ

يمن لُطْف الله كِلّه اِتجَلّه بَلْطافَك
تظَل حَيْ إنته و المذبوح سّيافك
أنا ابعين البصيره امّيّز أوْصافك
قُبل لتشوفك العين القلب شافك
وحيد او شايل الكون اِعْله أجتافك
تروّي الدنيا كلها او يابِسه اِشفافك

أني دونَ ما رَيْنٍ
                          بلا عيْنٍ أراكا
تدعُو اللهَ بالخطبِ
                          فيا ربّي رِضاكا

للهِ تُقاسي
                          في كلِّ الحَوَاسِ
يا نبضًا لإحْساسِي
                          بأنفاسي هواكا
فالقلبُ وَ ما يهوى
                          ولن يهوى سواكا
قد عِشْتُ المآسي
                          في كلّ الحَوَاسِ
يشِب جانُون بحشاي ابألِف جَمره
حرارة قلبي تِجوي اِجْهنّم الحَمره
بعدني اِشما أزور اَستَنْشق الذِكرى
أشم ريحة حَرِق من خيمه مِستعره
ابْدُخَان امخيّمك مِتْبِخّره الحضره
اِبترابك ريحة التُفّاح منتشره
فاحٍ القبرُ بالعِطرِ
                          شذى النّحْرِ شذاكا
يذكُو الطّيبُ و المِسْكُ
                          كما يذكو ثَراكا
ريْحانْ ب آسِ
                          في كلّ الحَوَاسِ
يا نبضًا لإحْساسِي
                          بأنفاسي هواكا
فالقلبُ وَ ما يهوى
                          ولن يهوى سواكا
قد عِشْتُ المآسي
                          في كلّ الحَوَاسِ
مثل باقي الحوَاس ابحسرتي او ونّي
السّمِع ماخذ نصيبه او شارك ابحزني
أنا اشما حاولت أنسى الحصل لّني
أريد أسمع ألا مِن ناصِر ابإذني
علي الأكبر أسمعه اينادي أدركني
واسمعك من صحت آه يبني آه يبني

مِهْراقًا جرى دمعي
                          ففي سمعي نِداكا
واسْتَوْطَنْتَ مَأسَاتي
                         فآهاتي صَداكا
صدّعْتَ الرّوَاسي
                          في كلّ الحَوَاسِ
يا نبضًا لإحْساسِي
                          بأنفاسي هواكا
فالقلبُ وَ ما يهوى
                          ولن يهوى سواكا
قد عِشْتُ المآسي
                          في كلّ الحَوَاسِ
أن المِتذوّق  اِسمك بين وجداني
شِفِت طاريك يِجْبُر بيّه نُقصاني
يمن ذِكرَك ملِح بجروحي غذّاني
شِرَبْت اِدموعي حتّى اشْتدّت اَركاني
على امصابك أحير اشلون سُلواني
إذا لليوم حزنك طَعْمه بلْساني
كلُ الكوْنِ بالشّجْوِ
                          بما يحوِي بكاكا
حتّى دمعيَ الجاري
                          بهِ الباري حَباكا
بالدّمْعِ اِنْبِجَاسي
                          في كلّ الحَوَاسِ
يا نبضًا لإحْساسِي
                          بأنفاسي هواكا
فالقلبُ وَ ما يهوى
                          ولن يهوى سواكا
قد عِشْتُ المآسي
                          في كلّ الحَوَاسِ
شقول اشلون اكبر عالجرِح و أنسه
حواسي الخمسه تبجي اِلخامس الخمسه
أنا الشايل حزن بيه حارت الخنسه
عشت أحزان قلبه حتّى باللّمسه
أجيس الماي و اذكر عِزِته ابنفسه
عشر ابْحُور بيده اْو بالعطش أمسه
ظام بالعَرَا تُمسي
                          وَذِي نفسي فِداكا
كيف الأرضُ ما سختْ
                         وقد ساحتْ دِمَاكا
يا صَعْبَ المِرَاسِ
                          في كلّ الحَوَاسِ
يا نبضًا لإحْساسِي
                          بأنفاسي هواكا
فالقلبُ وَ ما يهوى
                          ولن يهوى سواكا
قد عِشْتُ المآسي
                          في كلّ الحَوَاسِ
اِشْتَرِيت امْن الله كل شي من بعِت كلّك
خِلَق حتّى الحَوَاسِ الخمسه من أجلك
الشّمِس مهما توِج ما توصل لظلّك
رزِق كل الوُجود ابمائدة فضلك
أنوح أو يا حزن يحسين يوصلّك
العمُر أقصَر من السّهم الذِبح طفلك
عُمْرُ الدّهْرِ لا يكفي
                          ليسْتَوْفي أساكا
إن جافى مِنَ الضّنْكِ
                           وَلَمْ يبْكِ تباكي
يسعى كيْ يُوَاسي
                          في كلّ الحَوَاسِ
يا نبضًا لإحْساسِي
                          بأنفاسي هواكا
فالقلبُ وَ ما يهوى
                          ولن يهوى سواكا
قد عِشْتُ المآسي
                          في كلّ الحَوَاسِ

يا نبضًا لإحْساسِي،باسم الكربلائي،الميرزا عادل أشكناني

شيل سيفك ياشمر عن منحره

مقتل الحُسين [ع])
شيل سيفك ياشمر عن منحره
والله ذوّبني يباغي منظره

بالله أترجّاك رُحمه ياشمر
وشيل سيفك بالله شيله امن النحُر
شلون اشوفك تفري نحره واصطبُر
وخده اموسّد على حر الثرى

غيره ابهالدنيا ماعندي أحد
لا تذبحه ما بقى عندي جلَد
إرحم ادموعي ترى قلبي انمرد
وهاجت احزاني وبقيت امحيّره

شيل سيفك يارجس عن رقبته
ذوب اقليبي خليصي ابونّته
والله ينهد الصخر من حالته
وين جدي المصطفى يشوف الجرى

وين جدي ووين أمي فاطمه
ينظرون الشمر مكن صارمه
حالته اتذوب قلوب اهل السما
مالفى بهالساعه وينه حيدره

مارحمها وظل يحز نحر الشهيد
وعزل راسه وماج عرش الله المجيد
والسما ماجت له وماج الصعيد
وشقت اجيوب الحزن لمخدّره

----تمّت بحمد الله سبحانه----
لخادم أهل البيت (عليهم السلام)
الشاعر / حبيب الدرازي..

عبدالله ابني وضنوتي ليش المهد خالي

عبدالله ابني وضنوتي ليش المهد خالي
وين الألوليله ابلهف غالي وابن غالي
وين الذي من بسمته هالدنيه تحلالي
وين الذي مثل الگمر فوگ السمه عالي
...
ساكن دلالي .. ساهرت الليالي
يبني رد إليه .. بسمانه تلالي
عظيمه الرزيه .. عليك و عليه
وتفطمك يمحبوب .. سهم آل اميه
...
وعليك گلبي لو يحن وينك .. وينك يمحبوب
تشتاگ عيني تنظر العينك .. وينك يمحبوب
@@@
بهز المهد چنه الگلب هزيته بضلوعه 
يلي حلالك فرگته  ماترحم اللوعه
بس انحب ابليلي وون ابروحي مفجوعه
وعيوني صبت چن شمع تتنازف ادموعه
...
شمعه وي دمعه .. ودلالي طبعه
عالون تعلم .. ومهدك يفجعه
همومي ثجيله .. بگلبي او دليله
ارجع أليه .. امك عليله
...
يمهاد خالي والألم بيَّ .. بيَّ ترفگ
جمرات عيني مو دمع ليَّ .. بيَّ ترفگ
@@@
اتذكرك مثل الگمر بمهاده يتلاله
وعاقد عليك بهالعمر دلالي آماله
ماچان يحسب هالضنه للموت يحلاله
صوتي اذا اتذكرك من نوحي يتعاله
...
ادركني يبني .. امسحها عيني
ماوگف ابچاي .. ونيني وحني
امك عذرها .. خلص عمرها
فگدك يغالي .. والله كسرها
...
غالي عليه والألم يذبح .. يذبح دليلي
وذكراك لعروگ الگلب تجرح .. يذبح دليلي
@@@
صدري نشف من الظمه وانت العذب ردته
مابيّ حيل ألحالتك من منظرك شفته
وديت مهدك يالظنه عد عمتك عفته 
ابني انفطر  من الظمه اخذيه ياعمته
...
شگدر ألمه ..شيلي يعمه
يتلضه گلبه .. مگدر اضمه
وديته ليها ..  مالين اديها
ألحگ رضيعك .. ونشدت وليها
...
اخذ الظنه يابوعلي عطشان .. عطشان يتلظه
مبهوت لونه چالورد ذبلان .. عطشان يتلظه
@@@
وداك سالم للحرب يطلب ألك تشرب
ما چان سهم لحرمله نحرك گطع حسب
ابيض مهادك بالدمه من شفته امخضب
مذبوح جابك والعذب من منحرك تشرب
...
فطموا وريده .. گلبي وحيده
من حر سهمهم .. طلعها إيده
بدره وجماله .. ونوره التلاله 
بدال الرويه .. ذبحوا دلاله
...
من شفته مذبوح الظنه بدماه .. بدماه متروي
گلبي گبل ثغر نعى وناداه .. بدماه متروي
@@@
علي احمد الحمود
٢٢-٩-٢٠١٧
استشهاد الرضيع
محرم

يانحر ذباحه .. هذا بن بنت الرسول

يانحر ذباحه .. هذا بن بنت الرسول
ماتشوف اجراحه.. هذا بن بنت الرسول
خله بين اجروحه .. براحه تطلع روحه
هذا بن بنت الرسول
@@@
من بعد سفك وضمه وحاله شديده
الشمر لحسين گاصدله بوريده
وزينب تهرول اجت لبن الصميده
الشمر شافت على صدره وجيده
...
عالصدر متربع .. رايد ايحز النحر
والجسد متگطع .. رايد ايحز النحر
بي دمه مسفوحه  .. براحه تطلع روحه
هذا بن بنت الرسول
@@@
گالت الحره يطاغي خاف الله
ماتشوفه بحالته لا لا تقتله
موعليل ابجرحه بي مليون عله
وحتى چبده من خرز ظهره تدله
...
ماترطب گلبه .. منفطر من العطش
تضربه واتسبه  .. منفطر من العطش
همسه تسمع نوحه  .. براحه تطلع روحه
هذا بن بنت الرسول
@@@
گلها بعدي لا اذبحچ عالوطيه
وخلي جسمچ يم جسم ابن الزچيه
انا خادم وافتخر من آل اميه
والوعد هذا الجسد يبگه رميه
...
آمروني الساده .. من بعد ذبح الحسين
ما ارحْم اولاده .. من بعد ذبح الحسين
من نحر مفتوحه  .. براحه تطلع روحه
هذا بن بنت الرسول
@@@
قابض الشيبه بيساره وبان نحره
وخنجره المشؤوم بالرگبه يجره
حاول ابمرات ماگادر يكسره
حتى خله هالنحر بحزوزه حمره
...
وخنجره يستله  .. ابنحر سبطه العزيز
يدري طه يقبله .. ابنحر سبطه العزيز
يهبر ابمملوحه  .. براحه تطلع روحه
هذا بن بنت الرسول
@@@
ارفسه بخصره الشمر وامره كبر
بثنعش ضربه ابواليمه طبر
وظل يجر بخنجره وسط النحر
حتى حزه من بعد ضيم وقهر
...
الغليض احساسه .. يرفعه فوگ الرمح
گبال زينب راسه .. يرفعه فوگ الرمح  
وجثته مطروحه   .. براحه تطلع روحه
هذا بن بنت الرسول
@@@
گبال زينب دله راس وابتسم
بسمة الحاقد على حسين الشهم
وخله جسم حسين من تحت القدم 
شحال گلب الحره من جاه الألم
...
ضحكته تتعاله .. وراسه من شعره رفع
يفتخر بفعاله .. وراسه من شعره رفع
برگبته المفتوحه  .. براحه تطلع روحه
هذا بن بنت الرسول
@@@
علي احمد الحمود
٢٣-٩-٢٠١٧
المصرع
محرم

ياخامس اصحاب الكسه بوالأكبر

ياخامس اصحاب الكسه بوالأكبر
هالليله گلب اختك عليك اتفطر
ليلة الأخيره الليله .. ريت الليالي اطويله
هالليله گلب اختك عليك اتفطر
@@@
تصلح السيف وتتمتم تنعه نفسك بالمصيبه
وانا گلبي من سمعتك ولع ابجوفه اللهيبه
ارحم اوخيتك يخويه دهري ماخله حبيبه
ليّه ماباقي لمصابي إله بس انته طبيبه
من صغر سني الألم
عليّه بيامي حكم  
ولا جرح بيّه ألتأم .. وانته گاصد للحريبه
...
ريت الفجر لا ما تطر انواره
وباچر اصير ابمصرعك محتاره
إلمن بعد اشچيله .. ريت الليالي اطويله
هالليله گلب اختك عليك اتفطر
@@@
ودعت امي ابفجيعه تفطر الصم الصخر
من شفتها عالوطيه طايحه بضلع انكسر
والسياط ابلا رعايه عليها نزلت من أمر
تالي بصيامي يخويه عودي بالفجر انطبر
والحسن چبده انبضع
وانا دلالي انگطع
ويادوه غيرك نفع.. انته ياماي النظر
...
راحوا احبه وسافروا باللوعه
وانا اذا ترحل اضل مگطوعه
وانت الگلب اكليله  .. ريت الليالي اطويله
هالليله گلب اختك عليك اتفطر
@@@
انا وياك المسيه شيسده لو طر الصبح
امي گالتلي عليها باچر ادري تنذبح
وانا من كثر المصايب جرحي ينذر ابملح
من اشوفك عالوطيه جرح من فوگ الجرح
...
باچر اشوفن كل هلي مذبوحه
ونحرك على سن الرمح مفتوحه
باچر همومي اثجيله  .. ريت الليالي اطويله
هالليله گلب اختك عليك اتفطر
@@@
گلها يختي سامحيني هاي اخر مرحله
انتي ويايه المسيه وباچر اويه حرمله
الليله اهلچ كلها حولچ غيره عزه ومرجله
وباچر اتشوفي الضحايه وسدتهم كربله
كلمن ألموته نزل
الأكبر او حتى الكفل
وبس بگه ليچ بعلل.. علي وحده بعايله
...
يختي المسيه تشبّعي بالعتره
باچر تشوفي مذبحه عالغبره
أمر وصعب تبديله.. ريت الليالي اطويله
هالليله گلب اختك عليك اتفطر
@@@
وصيتي يختي إذا ما شفتي جسمي عالترب
والشمر جاني برهيفه بهيده مني يگترب
لا تجيني وتنتخيني والسهم وسط الگلب
اتربع الشمر اعله صدري وشيبي منه ينخضب
لا تجيني ابمصرعي
من يجيني ابن الدعي
ابمنحري وابلا وعي .. يضرب ابحده ضرب
...
يگلچ ابعدي لا اذبحچ فوگه
والله لخلي مهجتچ محروكه
وراسي بشماته يشيله .. ريت الليالي اطويله
هالليله گلب اختك عليك اتفطر
@@@
علي احمد الحمود
٢٤-٩-٢٠١٧
العاشر 
محرم

حالي وحالچ فاطمه

حالي وحالچ فاطمه
نار وضلع مهشمه
يوم لطفوف .. يوم لطفوف
@@@
اشرح امصابي ابمصيبة هجمة الدار 
يُمه يامهجة دليلي بالجره وصار
مشترك عدنه المصيبه يم لطهار
فارق العنچ تميز حز لنحار
...
حالي ..وحوالچ سوى 
لاچن .. چبدي مرتوى
تحت لسيوف .. يوم لطفوف
@@@
الحاوطوا دارچ ييمه تحاوط حماي
وفارق بحالي حشدهم يمنع الماي
الجاچ هدد واجتهد اجرام بالراي
بجتهاده چم وچم جابتلي دنياي
...
افتوا .. بيهم أنفتن 
وانتي .. گايلها و إن
الحال معروف .. يوم لطفوف
@@@
هشمت ضلعين منچ دفعة الباب
ومحسن اتعفر رميه فوگ لعتاب
وانا گلها اضلوعي يمه تسجل مصاب
وابني عبدالله لوريده صاب نشّاب
...
صوطچ .. لوع للمتن
خنجر .. هبرلي الوتن
مصاب موصوف .. يوم لطفوف
@@@
شرد اسولفلچ ييمه هوايه لهموم
چنه خدچ من بناتي خد ملطوم
من ركظتي وره حيدر بين هالگوم
مثلچ الحره العقيله اطيح واتگوم
...
حالچ .. بالطف انبعث
تعثر .. زينب بالجثث
اعضاء وچفوف .. يوم لطفوف
@@@
فارق بطفي المصيبه المامثيله
النزف صب ابمناحرنه مسيله
والأشد من كل مصيبه عالهزيله
تطلع ابچفها سلاسلها العقيله
منحر .. عالرمح انحمل
وهزل .. تفتر بالأهل
الناس واتشوف  .. يوم لطفوف
@@@
علي احمد الحمود
٢٥-٩-٢٠١٧
العاشر
محرم

قصه طفلي وقصه طفلك يــرويها البين

قصه طفلي وقصه طفلك   يــرويها البين
محتار المدمــع شيكـــلك  عن طفلك وين
  قارن وأنت احكم يوليدي بين الطفلين

1
     منين أبديلك             اظلم ليلك
وانه اظلوعي أكبــالك عالحايط عصروها
     وبــلا رحمه             يابو أليمه
عين أمك ياوسفــــه العدوان يسطروها
     عــاين حالي            آه يالــوالي
نار الشبت بيه هــــــــــــم بيك ايشبوها
     وزينب أختك           وكل عائلتك
  عنك يحسيــــــن لدرب الشام ايمشوها

نحرك بالسيف ايكطعونه    وتشوفه أطفال
يمه وردود أيــــــرفعونه    فوك العســــال
     وبياحال أتشوفك باجر عالغبره العين

2

بيني وبينك         عيني وعينك
ليك وليه أتلالي وماينشف مدمعها
لا من محسن       جلمات أتحن
ولا عبد الله يطول ويعيش بواقعها 
كلمه يمه        وكلمه بويه
لا إني الاسمعها ولا أنت ألتسمعها
وليدك ظامي       ومحسن دامي
والطفلين أدموعك ودموعي اتوادعها

ابني اليسكـــط يم ألعتبه     وتشوف أدماه
وابنك يمه الكوم أتسلبه     وتمـــوت وياه
انه وياك أنعيش ألحضــــــــــه نلقه مصابين
    

3

    بقصه طفلي              يثكل حملي
اقره أغياب المحسن مرسوم أعله عيونه
     طاح أكبالي               بس عذالي
رادو يحسين بذيج الساعة ايسحكـــــونه
     اليرحم وينه             خلــي أيعينه
همه الغدروا معقولة الكوم أيرحمـــــــونه
    وانه وضلعي             نبجي وننعي
عن طفلك يوم العاشر من أيذبحـــــــــونه

بجفــوفك عبد الله وليدك     ظامي وعطشان
لكن يحسين أنت شبيدك      تصيبه العدوان
بجفوفك وتعاين جبده ينطر نصيــــــــــــــن

4
شـــــــرد اذكر      نـــار التسعر
لو أتذكر ظلعي بالباب امـــــــن أتصوب
أتشوف عيوني       فوك أمتوني  
يشكف سوط العــدوان ابني خاف اتعذاب
       لكـــــــــن باجر     يـــــوم العاشر
منهو ايشاكف سوط ألغربه وينصر زينب
        محـــــــــد ألها      لا كــــــــافلها
    بيد الماترحـــــــــم باجر زينب تتسلب

لا راعي الراية ايحاميها       ليلــه عاشور
لا جسام اليحضــــر ليها       جاسم منحور
تنده بس محـــــــــــد يسمعها كلهم ميتين

5

     كــــل جلماتي         وكـــــل أهاتي
هاي القصة بــــــــــدمعي ودمعك جسدناها
    لكـــــن سكنه         تــــــزعل منه
لـــــــــــــو بت مسلم بهوال المحنه ننساها
    يـــــــامحنتها         ويــــاحسرتها
والدها  لمــــــــــــــــــــــن سافر يمك خلاها
    تناطر بالهم           جيت مســـــلم
ماتعرف متيتمه وبالغربـــــــــــــــة عافاها

بجتلـت مسلم لاتخبرها      خـــــافنها تموت
امسح دمعتها وصبرها     من يعلى الصوت
طفله وماتتحمل فــــــــــــركه واسيها الحين

6

       شيطلع منها      هــــــاي الدينا
غير ألونـــــه وغير الحسرة وغير المدمع
      انشــــر وني      وشيصبــــــرني
لــــــــو شفتك باجر يحسين بذاك المصرع
       وكل أخوانك      وكل رضعــــانك
تتسلب يوليدي وجدامك تتكطـــــــــــــــــع
      من ايوذروها   ويلمـــــــــــوها
تسحكها الخيل وبين الحــــــــــــافر تتوزع

وانه ومحسن نحضر ليكم     وحماي الجار
ونظل بألطف أنلــــــم بيكم     وانطفـي النار
وندور عالخنصر يمه وعـــــــــــــن الجفين

شطره
امجد صاحب الشطري